Şirvan şəhər Mərkəzi kitabxanası

Şirvan şəhər MKS
Tədbirlər
17 İyun , 2022
Sabirabad Regional Mədəniyyət idarəsinin təşəbbüsü ilə keçirilən "Həftənin kitabı" layihəsi çərçivəsində Şirvan şəhər Mərkəzləşdirilmiş Kitabxana Sistemi tərəfindən Elbrus Kəlbiyevin "Ölülərin pıçıltısı" dedektiv romanı həftənin kitabı seçilmişdir.
Hər şey məşhur "Oksford" Universitetinin azərbaycanlı tələbəsi Adil Çobanzadənin növbəti şikayət məktubundan başlayır. O, altı ay əvvəl evindəki iş otağında güllə yarasından ölmüş milyonçu atasının intihar etməsinə heç bir vəchlə inanmaq istəmir. Şirvan şəhərinə yeni təyin olunmuş prokuror polkovnik İlyas Ocaqov gənc tələbənin bu şikayəti əsasında işi yenidən araşdırmağa başlayır. Polkovnik ilk əvvəl hadisənin qətl olmasını üzə çıxarır. Bundan sonra əldə etdiyi hər bir mühüm dəlil qatilə yaxınlaşdırmaq əvəzinə, onu həqiqət nöqtəsindən daha da uzaqlaşdırır. Nəhayət ölmüş milyonçu Fərmanın özü polkovniki düzgün cığıra çıxarır. Amma kriminalistikanın dərinliklərinə qədər məlumatı olan məkrli qatili ələ keçirmək üçün İlyasa Şirvanda tapılan dəlillər bəs etmir. O, ən əsas dəlil dalınca daha uzaqlara getməli olur və bu uzaq yolda ən bağışlanılmaz səhvini edir...